ଭୁବନେଶ୍ୱର, ୧୮।୦୫: ରାଜ୍ୟରେ ଦିନକୁ ଦିନ ବୃଦ୍ଧି ପାଉଥିବା ଡିଜେଲ ଦର ଏବଂ ଉତ୍କଟ ଇନ୍ଧନ ସଙ୍କଟକୁ ନେଇ ଓଡ଼ିଶା ରାଜ୍ୟ ଟ୍ରକ ମାଲିକ ମହାସଂଘ ସରକାରଙ୍କ ବିରୋଧରେ ଆଜି ଏକ ବଡ଼ ଧରଣର ଆନ୍ଦୋଳନର ଚେତାବନୀ ଦେଇଛି। ଭୁବନେଶ୍ୱରଠାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ମହାସଂଘ ପକ୍ଷରୁ ସ୍ପଷ୍ଟ କରାଯାଇଛି ଯେ, ଯଦି ସରକାର ସେମାନଙ୍କର ମନମାନି ବନ୍ଦ ନକରନ୍ତି ଏବଂ ଟ୍ରକ ମାଲ ପରିବହନର ସର୍ବନିମ୍ନ ଭଡ଼ା ତୁରନ୍ତ ଧାର୍ଯ୍ୟ ନକରନ୍ତି, ତେବେ ଆଗାମୀ ଦିନରେ ସମଗ୍ର ରାଜ୍ୟରେ ମାଲ ପରିବହନ ସେବାକୁ ସମ୍ପୂର୍ଣ୍ଣ ଭାବେ ଅଚଳ କରିଦିଆଯିବ। ବସ ଭଡ଼ା ବୃଦ୍ଧି କରାଯାଉଥିବା ବେଳେ ଟ୍ରକ ଜଗତ ପ୍ରତି ସରକାରଙ୍କ ଉଦାସୀନତା ଓ କ୍ରମାଗତ ଆର୍ଥିକ କ୍ଷତି ଯୋଗୁଁ ମହାସଂଘ ଏଭଳି ଚରମ ନିଷ୍ପତ୍ତି ନେବାକୁ ବାଧ୍ୟ ହୋଇଛି ବୋଲି ପ୍ରକାଶ କରିଛି।
ତୀବ୍ର ଅସନ୍ତୋଷ ବ୍ୟକ୍ତ କରି ମହାସଂଘର ସାଧାରଣ ସମ୍ପାଦକ ପ୍ରଣବ କୁମାର ପରିଜା ଗଣମାଧ୍ୟମକୁ ଜଣାଇଛନ୍ତି ଯେ, ସରକାର ଦୀର୍ଘ ୨୦୦٨ ମସିହାରୁ ଆଜି ପର୍ଯ୍ୟନ୍ତ ଟ୍ରକ ପରିବହନ ଭଡ଼ା ବୃଦ୍ଧି କରିନାହାନ୍ତି। ଏପରିକି ଏ ସମ୍ପର୍କିତ ମାନ୍ୟବର ହାଇକୋର୍ଟଙ୍କ ନିର୍ଦ୍ଦେଶନାମାକୁ ମଧ୍ୟ ପ୍ରଶାସନ ପକ୍ଷରୁ ସମ୍ପୂର୍ଣ୍ଣ ଅଣଦେଖା କରାଯାଉଛି। ଗତ ୨୦୨୧ ମସିହାରେ କେବଳ ଖଣିଜ ଦ୍ରବ୍ୟ ପରିବହନ କରୁଥିବା ଗାଡ଼ିଗୁଡ଼ିକର ଦର ବୃଦ୍ଧି କରାଯାଇଥିବା ବେଳେ ସାଧାରଣ ମାଲ ପରିବହନ କରୁଥିବା ଅନ୍ୟାନ୍ୟ ଟ୍ରକଗୁଡ଼ିକର ସର୍ବନିମ୍ନ ଭଡ଼ା ନିର୍ଦ୍ଧାରଣ ପ୍ରକ୍ରିୟାକୁ ଜାଣିଶୁଣି ବାଦ୍ ଦିଆଯାଇଛି, ଯାହା ବ୍ୟବସାୟୀଙ୍କ ପାଇଁ ବୋଝ ଉପରେ ନଳିତା ବିଡ଼ା ସଦୃଶ ହୋଇଛି।
ଅପରପକ୍ଷରେ, ମହାସଂଘର ପୂର୍ବାଞ୍ଚଳ ଉପସଭାପତି ବିରଞ୍ଚି ନାରାୟଣ ପରିଡ଼ା ବର୍ତ୍ତମାନର ସ୍ଥିତି ଉପରେ ଆଲୋକପାତ କରି କହିଛନ୍ତି ଯେ ଆକାଶଛୁଆଁ ଡିଜେଲ ଦର ବୃଦ୍ଧି ସାଙ୍ଗକୁ ତୈଳ ସଙ୍କଟ ଯୋଗୁଁ ରାଜ୍ୟର ହଜାର ହଜାର ଟ୍ରକ ଏବେ ରାସ୍ତା କଡ଼ରେ ଅଚଳ ହୋଇ ପଡ଼ିରହିଛି। ଏଭଳି ସଙ୍କଟାପନ୍ନ ପରିସ୍ଥିତିରେ ଯଦି ସରକାର ତୁରନ୍ତ ବଜାର ଦରବୃଦ୍ଧି ଉପରେ ନିୟନ୍ତ୍ରଣ ନ ଆଣନ୍ତି କିମ୍ବା ଇନ୍ଧନ ସମସ୍ୟାର ସ୍ଥାୟୀ ସମାଧାନ ନକରନ୍ତି, ତେବେ ଏହି ସ୍ଥାଣୁତା ଆଗାମୀ ଦିନରେ ଏକ ପ୍ରଳୟଙ୍କରୀ ଅର୍ଥନୈତିକ ଆନ୍ଦୋଳନର ରୂପ ନେବ, ଯେଉଁଥିପାଇଁ କେବଳ ଶାସନ କଳ ହିଁ ଦାୟୀ ରହିବେ।
